Biz ýakynlaşmagy ugur edinýäris

Türkmenistanyň daşary syýasat edarasynyň ýolbaşçysy Raşid Meredow Birleşen Milletler Guramasynyň Howpsuzlyk Geňeşiniň ýokary derejeli açyk pikir alyşmalarynyň çäklerinde ýewropaly we latyn amerikaly hyzmatdaşlar bilen birnäçe möhüm ikitaraplaýyn gepleşikleri geçirdi.

26-njy maýda Germaniýa Federatiw Respublikasynyň Daşary işler federal ministrliginiň Ýewropa meseleleri boýunça döwlet ministri Günter Krihbbaum bilen geçirilen duşuşykda taraplar syýasy, söwda-ykdysady we medeni-ynsanperwer ulgamlarda türkmen-german hyzmatdaşlygynyň möhüm meselelerini jikme-jik ara alyp maslahatlaşdylar. Türkmen tarapy BMG-niň Howpsuzlyk Geňeşiniň ýokary derejeli açyk pikir alyşmalarynyň dowamynda Parahatçylygyň, howpsuzlygyň we durnukly ösüşiň hatyrasyna Bitaraplygyň dostlary toparynyň adyndan beýan edilen garaýyşlara aýratyn ünsi çekip, ählumumy krizisleri çözmekde öňüni alyş gurallaryna alternatiwanyň ýokdugyny nygtady.

German tarapy Aşgabat bilen uzak möhletleýin gatnaşyklary çuňlaşdyrmaga, şol sanda german işewürliginiň türkmen bazaryndaky ornuny giňeltmäge, adam maýasyny ösdürmäge hem-de «Merkezi Aziýa – Germaniýa» köptaraplaýyn strategik formatyndaky dialogy işjeňleşdirmäge ýokary gyzyklanma bildirýändigini tassyklady.

BMG-niň ştab-kwartirasynda Aşgabadyň diplomatik işjeňliginiň ýene-de bir möhüm ugry Raşid Meredowyň Kuba Respublikasynyň Daşary işler ministri Bruno Rodriges Parrilýa bilen geçiren doly formatly gepleşikleri boldy. Daşary syýasat edaralarynyň ýolbaşçylary döwletara gatnaşyklarynyň häzirki ýagdaýyna seljerme berdiler we hyzmatdaşlygy uzak möhletleýin geljekde diwersifikasiýa ýoly bilen ösdürmek boýunça anyk ädimleri bellediler.

Ministrler söwda-ykdysady pudagynda heniz peýdalanylmadyk uly mümkinçilikleriň bardygyny tassykladylar we iki ýurduň işewürler toparlarynyň arasynda göni gatnaşyklary höweslendirmek üçin bilelikdäki şertnamalaýyn-hukuk binýadyny iň gysga wagtda giňeltmegiň tarapdary bolup çykydş etdiler. Diplomatlar saglygy goraýyş, oba hojalygy, sport we syýahatçylyk ulgamlaryny hyzmatdaşlygyň iň geljegi uly amaly ugurlary hökmünde görkezdiler.

Gepleşikleriň netijeleri boýunça taraplar daşary işler ministrlikleriniň arasynda yzygiderli maslahatlaşmalary geçirmäge ygrarlydyklaryny tassykladylar hem-de özara hormat goýmak we ählumumy ynamyň sarsmaz ýörelgeleri esasynda dostlukly gatnaşyklary pugtalandyrmaga bolan ikitaraplaýyn maksatlaryny beýan etdiler.

Foto: mfa.gov.tm